अंगठेसरी-नाळेची वाट

    अंगठेसरीच्या वाटेवरून कांदोशी,रसाळ-महीपत रांगेचे सुंदर दृश्य 

या ट्रेकचा पूर्वार्ध कोंडनाळ-हातलोट घाट इथे वाचा
कोंडनाळ-हातलोट घाट

दिवस २:११ मार्च २०१८

कालच्या कोंडनाळ-मकरंदगड-हातलोट डोंगरयात्रेनंतर सह्याद्रीच्या कोंदणात वसलेल्या कांदोशीच्या हनुमान मंदिरात जी काही समाधानी झोप लागली त्याला तोड नव्हती.पहाटेच्या थंडगार वाऱ्यामुळे जाग आली.रात्री सांगितल्याप्रमाणे बर्गे मामा चहा घेऊन सकाळी ६ ला हजर.पूर्वेला ९०० मीटर उंचावलेला सह्याद्री बघून उगवत्या सूर्याबरोबर त्यालाही नमस्कार करून आन्हिकं उरकली.आजची डोंगरयात्रा साधारण ११ ते १२ तासांची होणार होती म्हणून बऱ्यापैकी खाण्याचा शिधा अन पाण्याचा पुरेसा साठा घेऊन कांदोशी सोडलं.वेळ सकाळी:७.१५

    कांदोशी गावातील प्रसिद्ध रामवरदायिनी मंदिर 

     डावीकडून:प्रजेश,निलेश,प्रसन्न,मुकुंद,विनायक,योगिता,कीर्ती अन प्रसाद
अंगठेसरी घाटाची सोंड बघून चढाई अतितीव्र असणार यात शंकाच नव्हती.अंगठेसरी हा पूर्ण नाकाडावर कोरलेली घाटवाट असून माथ्याशिवाय झाडोरा कुठेच दिसत नव्हता त्यामुळे उन्हं माथा ओलांडून आम्हाला गाठायच्या आत अंगठेसरी माथा गाठायचा आमचा प्लॅन होता.कांदोशी गावाबाहेर पडल्यावर ५ मिनिटांत एक सिमेंटचा पूल ओलांडला की डावीकडे अंगठेसरीची चढाई सुरु होते.याच पुलावर अंगठेसरी,नाळेची वाट अन तेलीसरी घाटवाटांचा त्रिवेणी संगम होतो. 

     पहिल्या पठारावरून अंगठेसरीची डोंगरधार 

एक-दोन घर ओलांडून ठळक अशी पायवाट वरच्या छोट्या पठारावर घेऊन जाते.तोडलेल्या झाडांच्या राशी बघून खिन्नता वाटत होती.संपूर्ण डोंगर लाकूडतोडीने उघडा-बोडका झालेला आहे.साधारण पाऊण तास तीव्र चढाई केल्यावर डोंगरसोंडेवरुन चढणारी वाट डावीकडे वळते.एक मजबूत ट्रॅव्हर्स मारत बारीकशी वाट घळीतून यू टूर्न घेऊन परत डोंगरसोंडेवर घेऊन गेली.वेळ सकाळी:८.४०                      

     डावीकडे वळसा घेतल्यावर लागणारी बारीक स्क्री वाट 

         अंगठेसरी घाटातील तीव्र चढाई 

आता वाट सोंडेवरून असेल असा अंदाज फोल ठरून वाट डोंगरसोंडेच्या उजव्या बाजूने वळसा घालत वर चढते.इथपर्यंत पोहोचल्यावर चांगलीच उंची गाठलेली होती अन वाट परत पदरातून डावीकडे वळत डोंगरसोंडेला भिडली.पाऊल बसेल एव्हढ्या वाटेवर स्क्री भरपूर असून डावीकडे दिसणाऱ्या २००० फूट खोल दरीमुळे नवख्यांचे डोळे इथे नक्कीच फिरू शकतात.डोंगराला बिलगत हे अवघड वळण पार करून डोंगरसोंडेवर विसावलो.पश्चिमेला दूरवर रसाळ-सुमार-महीपत रांग खोलवर खाली कांदोशी,डावीकडे नाळेची वाट अन तेलीसरी घाट बघून डोळे सुखावले.वेळ:९.५०

     अंगठेसरी घाटातील किंचित अवघड वळण..डावीकडे साधारण २००० फूट दरी

     अंगठेसरी घाटातील किंचित अवघड वळण..डावीकडे साधारण २००० फूट दरी

उन्हाची कोवळी किरणे आता अंगठेसरी माथा ओलांडून आली होती.धारेवर आरूढ होऊन एक तीव्र चढ चढला अन वाट उजवीकडे वळाली.मागच्या ३ तासाच्या तीव्र चढाईनंतर पदरातून वळसा घालताना वेगळीच मजा येत होती.बारीकशा नळीच्या वाटेतून वर चढताना माथा गाठल्याचा आनंद सर्वांच्या तोंडावर ओसंडून वाहत असतानाच मामांनी समोरच्या डोंगर माथ्याकडे बोट केल्यावर एक झाड बघून थोडस विसावलो.उन्ह आता चांगलीच तापली होती.शेवटचा ११० मीटरचा टप्पा भर उन्हात चढून अंगठेसरीचा माथा गाठला.वेळ सकाळी:१०.४०

                अंगठेसरी घाटातील शेवटचा टप्पा

     तीव्र चढाईनंतर पदरातून वळसा घालणारी वाट

शेवटची छोटीशी नळीची वाट

           अंगठेसरी माथ्यावरून दिसणार दृश्य 

१० मिनिटे थंड सावलीत आराम करून शरीराचं इंजिन थंड केलं.सह्याद्री माथ्यावरून रौद्र कोकणकडा अन कांदोशीच सुंदर दृश्य बघून पूर्वेकडे निघालो.दूरवर जंगल दिसत होत खर पण वाट उघड्या पठारावरून वळसा घालत होती.दरीपलीकडे दिसणार एकमेव घर गाठलं.घरात सध्या कोणीही राहत नाही.उत्तरेला मकरंदगड-घोणसपूर आणि कोंडनाळेचा माथा बघून कालच्या डोंगरयात्रेच्या आठवणीने तृप्त झालो.इथून जवळच डावीकडे उतरून दाभे मार्गे मकरंदगड गाठता येतो.आम्हाला नाळेची वाट गाठायची असल्याने साधारण दक्षिणेकडे झाडणीकडे जाणारी वाट धरली.पाऊण तासात मुख्य पायवाट सोडून उजवीकडे थोडंसं खाली उतरून घनदाट जंगलात शिरलो.समोरच गर्द सावलीत बारमाही पाण्याचा झरा गवसला.पोटोबासाठी चांगलं तासभर विसावून उदरअग्नी शांत केला.अतिशय रम्य अशा घनदाट जंगलात हा पाण्याचा झरा असून त्याला कोथळीच पाणी म्हणतात.काही जणांच्या डोक्यात इथेच वामकुक्षी घेण्याचा विचार येणं साहजिकच होत पण अजून बरीच डोंगरयात्रा बाकी असल्यामुळे पाणी भरून काढता पाय घेतला. वेळ दुपारी:१

         अंगठेसरी माथ्याजवळील कोकणकडा 

      अंगठेसरी-झाडणी दरम्यान लागणारे एकमेव घर 

       मकरंदगड-घोणसपूर आणि कोंडनाळ दृश्य 

         कोथळीच पाणी..थंड अन चवदार 

आता दक्षिणेला सपाटीवरून कधी जंगलातून कधी उघड्यावरून मार्गक्रमण करत झाडणीकडे निघालो.इथून नाळेची वाट गाठायला दोन मार्ग आहेत.

१.झाडणीतून तांबटधारेने निरपजी मंदिर बघून नाळेची वाट गाठता येते.हा मार्ग लांबचा असून २-३ तास अधिक वेळ लागतो.

२. झाडणीच्या साधारण १ किमी अलीकडे पश्चिमेला एक डोंगरधार थेट नाळेच्या वाटेवर नेऊन सोडते.निरपजी मंदिर अन कांदाट बायपास करायचे असल्यास हा मार्ग खूपच जवळचा अन कमीत कमी वेळेत कांदोशीत पोहोचण्यास उपयोगी.

आम्ही मागच्या तेलीसरीच्या वेळी कांदाट खोरे अन निरपजी मंदिर बघितले होते त्यामुळे यावेळी दुसरा मार्ग पायाखालून घालायच्या संधीच आम्ही सोन करायचं ठरवून उजवीकडे जाणाऱ्या पुसटश्या वाटेने माथ्यावर पोहोचलो.साधारण दक्षिणेला दूरवर तांबटधार अन त्याखाली निरपजी मंदिर परिसर दिसतो.समोर खोलवर एक घर दिसत त्याच घराची दिशा पकडून उतरायला सुरुवात केली. वेळ दुपारी:२.३० 

    झाडणीच्या अलीकडे पश्चिमेला नाळेच्या वाटेकडे उतरणारी डोंगरधार

   झाडणीच्या अलीकडे पश्चिमेला नाळेच्या वाटेकडे उतरणारी डोंगरधार

मस्त मळलेल्या वाटेने धारेवरून उतरताना चोरकणा घाटाची आठवण झाली.पाऊण तासात मगाशी वरून पाहिलेल्या घराजवळ पोहोचलो.काळे कुटुंब या घरात राहतात,मामांचे नातेवाईकच ते.लागलीच ताक समोर आले.मुकुंद सर,प्रजेश अन विनायक यांनी नेहमीप्रमाणे हावऱ्याप्रमाणे ताकावर हात आडवा केला.प्रसाद अन निळू भाऊंनी लिंबू सरबत बनवले.गप्पा टप्पा करत सह्याद्रीच्या कुशीत निवांत विसावलो.थोडंसं पाणी घेऊन पुढची उतराई सुरु केली.

      नाळेच्या वाटेवर असलेलं एकमेव घर

                   नाळेच्या वाटेवर..

तीव्र उताराच्या वाटेने उतरताना उजवीकडे काही खिंडी दिसतात अन हीच नाळेची वाट असा समज होऊ शकतो.अशा ३ खिंडी मागे टाकून जंगलात शिरलो.किर्रर्र जंगलात निरपजी मंदिराकडून येणाऱ्या वाटेला गाठलं.माथ्यापासून ४६० मीटर्सची उतराई झाली होती.नाळेची वाट उंचीला बुटकीअसून एक छोटासा सोपा कातळटप्पा उतरून नाळेत शिरलो.तासाभरात नाळेतील दगदगडांवर टुणूक-टुणूक उतरत पायथा गाठला. वेळ:संध्याकाळी:५

                     नाळेची वाट सुरुवात 

           नाळेची वाटेतील सोपा कातळटप्पा 

       पायथ्यातून नाळेची वाट 

जगबुडी नदीच्या काठाने सपाटीने आता कांदोशीकडे निघालो.एक-दोनदा जगबुडी नदी पार करत तेलसरी घाटाच्या पायथ्यातून सकाळी गेलेल्या सिमेंटच्या पुलावर पोहोचलो.रामवरदायिनी मंदिर अन रसाळ-सुमार-महीपत रांगेच्या बरोबर मागे सूर्यास्त होत होता अन आमच्यामागे अंगठेसरी माथा अधिकच उंच  भासत होता.

      सुंदर सूर्यास्त अन रम्य कांदोशी गाव 

या डोंगरयात्रेचा संपूर्ण व्हिडिओ पाहण्यासाठी खालील लिंक क्लिक करा 

 नोट:

 १.अंगठेसरी घाट हा कुशलतेने सह्याद्रीच्या नाकाडावर बनवलेला असून वाट बारीक अन स्क्रीयुक्त असून चढाई/उतराई करताना काही ठिकाणी काळजी घेणं आवश्यक.

२.शक्यतो सकाळी लवकर चढाई/उतराई करावी.अंगठेसरी घाटात सावलीसाठी कुठेही मोठं झाड नाही.

३.फक्त ३ किमी च्या अंतरामध्ये ८०० मीटर चढाईची मजा देणाऱ्या फार मोजक्याच डोंगरयात्रा महाराष्ट्रात आहेत.त्यातील अंगठेसरी एक आहे.(खुट्टेदार-रामपूर ते दुर्ग किल्ला अजून एक अशीच दमदार चढाई आहे)

महत्वाच्या नोंदी :

सुरवात:कांदोशी शेवट:कांदोशी

मार्ग: कांदोशी-अंगठेसरी-झाडणी-नाळेची वाट-कांदोशी

श्रेणी:मध्यम

एकूण डोंगरयात्रा:१७.९ किमी

चढाई उतराईतील टप्पे:

कांदोशी (८४मीटर्स)-अंगठेसरी माथा(८८४ मीटर्स)-झाडणी(९४५ मीटर्स)-नाळेची  वाट खिंड(४७० मीटर्स)

  

प्रसन्न वाघ

वाईल्ड ट्रेक ऍडव्हेंचर