सह्याद्रीत मनसोक्त भटकताना काही काळानंतर हिमालयाची ओढ ही आपसूकच लागते हे काही वेगळं सांगायची गरज नाही.तस पाहिलं तर गेली १७ वर्षे सह्याद्रीत फिरूनही मन काही हिमालयाकडे वळले नव्हते.रुपकुंड या ५००० मीटर्स वरील बर्फाच्छादित तळ्याला भेट द्यायचं ठरलं अन हिमालयातील डोंगरयात्रांचा नारळ फुटला.वाइल्ड ट्रेक ऍडव्हेंचर या आमच्या संस्थेचा रुपकुंड ट्रेक ठरला अन १३ जणांची टीम या ट्रेकसाठी सज्ज झाली.
प्रसादच्या मार्गदर्शनाने आवश्यक तयारी करायला फार त्रास घ्यावा लागला नाही.हिमालयात डोंगरयात्रेला जाताना आपल्या बरोबर घ्यायचे साहित्य हे चांगल्या दर्जाचे असावे त्याचा ट्रेक्स दरम्यान खूपच फरक पडतो.
१६ जुन २०१६:
सर्व सॅक खचाखच भरून आम्ही ७ जणांनी प्रायव्हेट गाडीने पहाटे ४.३० ला पुणे सोडले.लोकमान्य टिळक टर्मिनसला(कुर्ला) पोहोचुन पुण्याच्या इतर ३ सदस्यांना भेटुन नमस्कार चमत्कार झाला.आमची ट्रेन १२१७१ मुंबई लोकमान्य टिळक टर्मिनस-हरिद्वार वातानुकूलित एक्सप्रेस बरोबर सकाळी ७.२० ला प्लॅटफॉर्मवर आली अन ठरलेल्या ७.५५ च्या वेळेनुसार आम्ही मुंबईला बाय बाय केलं.पुढच्या अर्ध्या तासात कल्याणमध्ये टीमच्या फायनल ३ सदस्यांना ट्रेनमध्ये सामावून आमचा हरिद्वारकडे २९ तासाचा प्रवास सुरु झाला.पुढचे १० दिवस पूर्ण टीम हा ट्रेक करणार असल्याने सर्वानी एकमेकांची चांगली ओळख करून घेतली.
सारंग,शेंडे काका दुसरी ओळ:संदीप,अमनदीप,प्राची)
या २९ तासाच्या प्रवासात आराम अन मौजमजा करत दुसऱ्या दिवशी दुपारी १.१५ ला आमची टीम हरिद्वारच्या देवभुमीत पोहोचली.स्टेशनच्या बाहेर भक्तांची अन भगवे वस्र परिधान केलेल्या बाबांची बरीच गर्दी होती.
१७ जून २०१६:
स्टेशनबाहेर आधीच ठरवलेली टेम्पो ट्रॅव्हलर आमच्यासाठी सज्ज होती.दुपारी १.३० ला आमचा प्रवास कर्णप्रयागकडे सुरु झाला.हरिद्वार-कर्णप्रयाग हे अंतर १९३ किमी असुन साधारण ९-१० तासांचा प्रवास आहे.हरिद्वारमधून बाहेर पडताना विस्तीर्ण गंगेचं रूप पाहून डोळे विस्फारले.साधारण तासाभरात ऋषिकेशचा लक्ष्मण झुला वाटेवरूनच पाहून नमस्कार केला.ऋषिकेशपासून खडतर घाटमार्ग सुरु होतो.ब्यासी गाव सोडल्यावर एका हॉटेलवर जेवणासाठी थांबलो.सभोवताली आता उंचच उंच पर्वतरांगा दिसू लागतात.
देवप्रयागमध्ये पोहोचताच गंगा अन अलकनंदा नदीचा संगम दिसतो.(प्रयाग म्हणजेच संगम). श्रीनगर(उत्तराखंड) हे या मार्गातील सर्वात मोठे शहर पार करत संध्याकाळी ७.३० ला आम्ही रुद्रप्रयागमध्ये पोहोचलो.रुद्रप्रयागमध्ये अलकनंदा अन मंदाकिनी या नद्यांचा संगम आहे.चहा नाश्ता करून थोडासा ब्रेक घेण्यात आला.रात्री ९.३० ला आम्ही कर्णप्रयाग येथील मुक्कामाच्या हॉटेलमध्ये पोहोचलो.कर्णप्रयागमध्ये पिंडारी अन अलकनंदा नद्यांचा संगम आहे.रात्रीचे जेवण करून पहाटे ४ चा वेकउप कॉल ठरवण्यात आला.उद्या खऱ्या अर्थाने रुपकुंड मोहिमेची सुरुवात होणार असल्याने सर्व टीमचे सदस्य आपापल्या रूममध्ये जाऊन लागलीच निद्राधीन झाले. .
या ट्रेकचा विडिओ पाहण्यासाठी खालील लिंक क्लिक करा
भाग १
प्रसन्न वाघ
वाइल्ड ट्रेक ऍडव्हेंचर
No comments:
Post a Comment